返回列表 回復 發帖

[後記] 10-08-20~22 我的三天之旅(澳門) 更新 #30, 48

本帖最後由 雨C 於 26-8-2010 08:53 編輯

本來都冇諗著寫後記架,  但係呢三日睇仔實在睇得太開心, 所以決定寫少少嘢嚟同大家分享.

第一天

第一日匆匆忙忙咁趕去馬交諗著捕仔, 但係又唔知個仔喺邊度喎. 冇理由喺酒店呆坐等佢架??  又唔知佢幾時返??  所以就同幾個千姑去咗食飯同行街街喇.  行行下突然收到個千姑電話話阿仔好似喺某個旅遊境點拍緊戲喎???  哇~~~~發大達喇, 有理冇理都打的趕去探下路先啦.  雖然個千姑都話到明唔好抱咁大嘅期望.  唔好諗著會見到個仔.    唔理咯, 見唔到都叫做盡過力吖嘛.

去到現場之後發覺原來都幾編癖下,  但係聽聞係有穿梭巴士架喎, 咁啱見到有架巴士停喺度, 梗係問清楚幾點有車先啦.  容乜易一陣間冇車走架.  咁我咪走埋去問個司機幾點一班車囉.

我 : 阿哥呀, 請問最後一班車幾點開架??

司機 : 我呢架車唔係巴士嚟架, 拍戲用架.

我 : (個心開始加速跳動, 似乎冇揾錯地方喎.  嘻 嘻~~~) 乜呢度有人拍戲呀??  

司機 : 阿 Rain 吖嘛!!!

我 : 哦~~~~~~~(做出一個好迷茫嘅表情)      邊個阿 Rain 呀??   (完全喺度扮無知.   阿仔唔好怪我呀, 我都唔想架.  呵~~~~)

跟著我就撐著把遮, 扮晒遊客咁四週圍望喇.  一行入目的地就見到王子著著黑色背心, 軍綠色卡其褲, 白色波鞋遊遊閒閒咁伸長一隻腳坐喺樓梯度, 重有宮女喺度幫佢撥扇乘涼, 鬼咁舒服.  差唔多到佢拍嘅時候, 佢就企起身等埋位.  可能因為天氣太熱, 佢拿高件背心撥涼. 搞到我雙眼噴火, 口鼻噴血~~~~ 但係我點都要忍著, 唔可以尖叫出聲, 因為一叫就會畀人發現我唔係一個普通遊客, 而係為阿 Rain 而嚟.  所以我都忍得幾辛苦下架.  kakakaka~~~~~~~~

嘿嘿~~~終於到阿仔出場喇.  阿仔趴喺樓梯度, 頭下腳上, 伸展四支喺度大叫一聲 : 呀~~~~~~  我差啲忍唔著笑咗出嚟, 好彩掩嘴掩得快啫, 唔係就閉家火喇.  佢拍呢下動作都拍咗成十次個導演先收貨.  一拍完呢阿仔就走咗入啲陰涼嘅地方坐嚟度, 即時又有宮女埋嚟幫王子撥扇喇.  阿仔拍完呢個鏡頭就有其他人喺度排下一個鏡頭, 咁我就襯呢段時間週圍行下, 後來揾到個有利位置. 我可以睇到仔時亦唔會阻礙拍攝.

阿仔由樓梯打到去地下, 再由地下打上平台.  雖然只不過係幾個鏡頭, 但係已經打咗成日.  可能只係兩三分鐘嘅鏡頭, 原來佢哋已經用咗一日時間去拍攝, 真係每一下動作都有血有汗.  有個臨時演員, 我去到嘅時候本來係一隻白皮猪, 到我走嘅時候都晒到變燒猪.  好彩我哋嘅王子唔使排戲, 唔係由朝晒到晚都幾係嘢.  但係阿仔經過咁多日嘅拍攝, 都已經晒到黑嘛嘛.  同我上次見時相差好遠.  有一件事真係要讚下我哋嘅王子, 我發覺阿仔真係好聰明, 學習能力好強勁, 每下動作只要個武指示範一次, 阿仔就已經可以好流輰咁做出嚟.  你都咪話唔厲害~~~~~

我睇咗大約兩個鐘頭,  因為怕冇車走所以就打道回府.  返到去酒店又見到其他千姑, 咁我哋又一齊傾下偈, 講下今日嘅追仔經歷.  大約六點鐘就見到阿仔嘅車返酒店喇.  因為唔想令阿仔為難, 所以我同兩位千姑就好似普通人望明星咁, 望咗幾眼, 冇咩特別表情.  阿仔入門口嘅時候都有望我哋呢邊,  但見我哋冇咩表情就直行直過嚕.  我哋亦冇追著佢.  唔想阻著王子返房休息.

待續...........................
橫風狂三月暮, 門掩黃昏, 時時留비住 。

海蕩漾全年朝, 窗吐晨光, 日日待비來。

雨雲之家千秋萬載, 來。

好精彩, 好生動,我好似跟在你後面和你一齊行...
nycuckoo 發表於 24-8-2010 10:04
我本來想形容多啲阿仔嘅動作架, 但係我驚我形容得太仔細, 講咗啲劇情出嚟.  

一套咁精彩嘅劇集, 緊係留番嚟自己親眼睇好啲啦.
橫風狂三月暮, 門掩黃昏, 時時留비住 。

海蕩漾全年朝, 窗吐晨光, 日日待비來。

雨雲之家千秋萬載, 來。

雨C 佢真係可以做皇牌老臨架!
yswong 發表於 24-8-2010 11:10
嘿嘿  唔揾我做老臨, 簡直係套劇嘅損失.
橫風狂三月暮, 門掩黃昏, 時時留비住 。

海蕩漾全年朝, 窗吐晨光, 日日待비來。

雨雲之家千秋萬載, 來。

第二天

第二日, 完全係一個 bonus, 跟本冇諗過會再見到阿仔.  我呢日係瞓到自然醒, 然後就同班千姑去咗食早餐, 之後重諗著去睇天幕表演同埋去威尼斯人度行下,  我哋攞咗表演嘅飛, 然後就週圍行下, 坐下, 消磨時間.  到差唔多入場嘅時候, 突然又收到消息話阿仔喺某地方拍攝,   呢次嘅拍攝場地唔係咩旅遊勝地, 而係一個墳場.  哈 哈~~~ 墳場喎, 我驚驚架喎??!!  唔理喇, 雨神力量大過天, 照去可也.  最好笑就係有個千姑問 : 咁我哋去睇表演定睇仔呀??  我哋一齊大叫 : 緊係睇仔啦!!!  重使問嘅.

咁我哋又飛的去拍攝場哋喇, 上咗車個司機問我哋~~~~~~

司機 : 邊個墳場呀??  

我哋 :(驚愕中)   吓???!!!!  乜有好多墳場架????   

司機 : 成個山頭都係喎, 你究竟去邊忽呀???

我哋 : MUM............. 去咗先啦, 邊忽似就去邊忽啦.

咁個司機就車咗我哋幾朵茂盛嘅梨花去咗某個墳場入口.

我哋 : 噫??!!  到咗喇??  咁靜英英嘅??  唔多似喎??  (實在太多問號)

好彩我哋遇到個好好嘅的士司機, 佢叫我哋唔好落車著, 再車我哋一路揾, 一路揾, 終於揾到我哋想去嘅目的地.  

我行咗幾步樓梯度就見到一個 "引人入性" 嘅背影企喺度喇.  呵 呵~~~~好一幅美麗嘅圖畫呀.  搞到我流晒口水, 路都唔識行添. 好彩我冇差錯腳碌落樓梯啫, 唔係就見紅喇.  嘿嘿~~~~
咪著~~~~如果係碌落阿仔嘅腳邊, 咁就另作別論, 跌死都抵啦. 呵呵~~~~~~

阿仔呢次係著著件白色背心, 淺藍色牛仔褲.  因為阿仔嘅上半身實在太吸引, 佢著咩鞋我就冇留意到喇.  為咗唔好阻礙拍攝, 哦哋就喺啲墳墓度左穿右插, 揾啲墓碑遮遮掩掩.  後來睇真啲, 原來成個山頭都係 "雲". 雲頭湧湧, 直頭可以同香港馬騮山嘅馬騮睇齊.  最搞笑就係有個千姑嘅老公搭的士上山揾老婆, 個司機同佢講 : 我十年都唔上嚟一次, 但係今日就上咗嚟三次, 而且次次都係香港女人,  究竟上面有搞咩花臣呀??  哈 哈~~~~~ 可惜我唔喺度, 如果我喺度, 我一定會答 : 成班女人咪上去朝聖, 朝拜雨神囉.  哈~~~~~~~

哇, 阿仔呢次就辛苦過噚日嚕,  因為拍攝場地冇咩地方遮蔭, 只係有一棵樹仔, 雖然未到阿仔出場嘅時候阿仔都會喺樹蔭度唞下,  亦有人幫佢撐傘遮下太陽.  但阿仔今日係拍打戲, 而且呢次重要由主角親自排戲, 所以佢都冇咩機會休息, 佢同其他臨記一樣晒足全場.   當排戲嘅時候, 因為天氣實在太熱, 所以阿仔連背心都除埋, 三點畢露 (唔好心邪呀, 我指嘅第三點係肚臍嚟咋).  你都咪話, 今日真係熱到爆, 我齋企係樹蔭之下, 郁都唔郁, 都可以搞到汗流浹背.  何況阿仔要打到飛起??  畀著我??  連皮都想剝呀.

阿仔呢次打得非常落力, 佢帶著隻手銬, 又飛掙, 又踢腿,  一個打十個, 拳拳到肉, 睇見都肉緊呀!!!  後來因為個導演想影個墳場全境, 所以有工作人員叫我哋行開一陣, 拍完全境之後會通知我哋出去繼續欣賞王子嘅精彩演出.  你知啦, 我哋係一群乖巧嘅 "雲"嚟架嘛, 當然係二話不說就撤退啦, 啲工作人員亦好有口齒, 太約兩三分鏡後就通知我哋搞掂, 可以蒲頭繼續睇.  呵 呵~~~~我俊俏嘅王子呀, 我又嚟喇.  呵~~~~~~~

今日阿仔都係由頭打到落尾, 正式拍攝時就會著番件背心, 導演一嗌 cut 阿仔就嗱嗱林除晒啲衫, 肉光四射.  (嗱, 講明呀, 係衫咋, 佢條褲好貼貼服服咁黐住下半身架.)   呵呵~~~ 阿仔, 你阿娘我貧血架, 你想我暈係現場咩??  嘿嘿, 嘿嘿............

同噚日差唔多, 我睇咗太約兩個鐘之後就見到啲工作人員執嘢準備離開.  我哋王子就走入涼亭乘涼, 等到咁上下就行上嚟準備閃人喇,  咁我就企喺度睇著阿仔迎面而嚟, 阿仔嘅影像喺我眼中放大, 放大, 再放大.  越嚟越近, 直至喺我面前經過. (啊~~~~仔呀!!  你可唔可以唔好咁靚仔呀?? )  佢喺上車前停一停, 向啲 fans 揮手道別, 上咗車之後都繼續揮手.  我就係咁望著阿仔架車離開.  
bye, bye 喇阿仔,  希望我哋有綠再見啦.

待續......................

~~~~追仔翻外編~~~~

講番啲題外話先, 話說喺我哋等車走嘅期間, 有個墳場嘅員工問咗我少少問題 :

員工甲 : 頭先嗰個係咪阿 Rain 呀??

我 : 係呀.

員工甲 : 我都覺得佢好熟面口, 完來真係佢.   我聽講佢好受女人歡迎架喎??

我 : 你見到連墳場都有咁多女人追到嚟就知啦.

員工乙 : (搭訕)  阿 Rain 好勁架??

員工甲 : 韓國明星嚟架, 喺香港重紅呀.

我 : (好大聲咁答) 係呀,  係呀, 佢好紅好勁架.
橫風狂三月暮, 門掩黃昏, 時時留비住 。

海蕩漾全年朝, 窗吐晨光, 日日待비來。

雨雲之家千秋萬載, 來。

雨娘, 睇番你段後記, 又諗番記個日既事, 真係無諗過農曆七月會去墳場,
我地担住遮, 撥住扇都熱到想死, 難為阿仔要拍動作戲, 就算有 幾個宮女幫佢扇風, 都覺得佢好辛苦,
班動作演員更慘, 全身貼肉黑色, 好驚佢佢中暑 ...
jolinwng 發表於 25-8-2010 08:53
所以呢次我唔可以再扮遊客嚕, 我諗都冇乜遊客會去墳場觀光喇啩??
橫風狂三月暮, 門掩黃昏, 時時留비住 。

海蕩漾全年朝, 窗吐晨光, 日日待비來。

雨雲之家千秋萬載, 來。

問你地個千姑之唔係我囉....好笑咩
為你地好咋...因為始終係舊曆七月,聽見要去墳場,我地又唔係地頭蟲,當然要問一問啦,唔多老黎架嘛

知唔知你地嗰日對嗰度嘅住客幾不敬呀,個個都掛住向下望睇仔,用個背 ...
anissa 發表於 25-8-2010 09:42
有雨神照著, 我諗唔怕啩??  況且我都好有禮貌講唔好意思架.
橫風狂三月暮, 門掩黃昏, 時時留비住 。

海蕩漾全年朝, 窗吐晨光, 日日待비來。

雨雲之家千秋萬載, 來。

第三天

第三日, 亦都係最後一日.  因為喺第二日追仔追得太開心, 所以夜晚約埋班千姑講下追仔心得. 點知越傾越興奮, 個個都唔捨得瞓.  諗著~~~冇所謂啦, 橫掂聽日都冇乜特別嘢搞.  可以瞓到十一點幾先起身, 然後順便 check out, 再出去食嘢行街.  諗得幾咁完美呀!!!   所以我嗰日好早瞓吖, 早到喺朝頭早五點幾先瞓覺!!!  瞓到矇矇矓矓之中, 有電話响喎.  吓??!!  好似啱啱笪落床咋喎, 乜咁快十一點幾喇??  跟著聽到千姑講, 阿仔出咗車喇, 我哋去唔去睇仔呀??  我聽到即時彈起身, 但又忍唔著笪番落張床度再瞓過.   啊!!!  我唔聽話嘅身軀呀!!!  跟著問個千姑而家幾點??   佢話八點幾.  啊~~~雨神賜我力量.  再用意志力彈起身, 然後匆匆忙忙咁擦牙洗面, 執番晒啲眼耳口鼻,  跟著就裙拉褲甩咁出發喇.  點知喺出發之前再收到消息話阿仔已經拍完走咗.  (唉, 當堂謝晒)  喺無奈之中唯有提早出去食嘢,  咁我哋成班千姑就搭巴士出去喇.  喺搭巴士途中, 又收到消息話阿仔又再出現.  (衰仔, 連阿娘都玩??)  嘿嘿~~~ 重飲咩茶吖, 嗱嗱林轉車碌去現場啦.  好彩馬交細啫, 幾驚趕唔切呀.  阿仔~~~你要 "頂" 我呀!!!!  你 "頂" 埋我先好走呀!!!!

去到現場就見到好多 "雲" 已經捕晒喺度等仔.  八掛一問之下, 原來阿仔晨咁早已經喺度拍緊.  嘿嘿, 執輸行頭慘過敗家,  緊係即刻問清楚阿仔走咗未啦.  好彩, 原來重未走.  算你啦, "頂" 埋我先走.  唔係我就~~~~~~~~~~~.

都係嗰句啦, 為咗唔想阻礙拍攝, 所以我哋都好乖咁冇走上去同一層等, 喺下一層等就算喇.  (現場地方唔算大, 費事影咗我入鏡啦.  我咁靚, 容乜易畀個導演發現, 驚為天人咁就唔好啦. )  咁大約等咗十五分鐘到, 就見到阿仔出現喇,  本來啲工作人員帶咗阿仔行樓梯,  但阿仔行咗幾步就指著個電梯返轉頭搭電梯喇.  (唔知係咪因為啲 "雲" 喺電梯口等佢, 佢為咗畀我哋望多兩眼, 所以改搭電梯呢??  呵呵, 唔係都當係.  自我淘醉中.)

偷條片使下先.   當時嘅情形就係咁喇, 我都喺現場架,  不過我就冇影片同相, 所以要做賊, 我諗 MaggieS 唔會報警拉我啩??

http://www.raincloudhk.com/bbs/v ... &extra=page%3D1  

我呢啲老人家, 當然唔會追著個仔跑啦.  (唔係唔想, 而係力不從心.)  咁我就喺後面, 望著個仔慢慢行上車喇.  阿仔上咗車之後就坐咗喺入面個座位, 我唯有隔著塊玻璃偷偷看, 偷偷望.  跟著聽到個雲嗌 : 男二呀~~~~  吓??!!!  乜男二喺度咩???!!!  再望清楚, 係喎, 坐喺近車門嗰個就係男二喎, 佢幾時上咗車架.  乜解究我唔發覺架??  撞鬼, 人哋咁大件坐喺門口度, 又冇遮冇擋. 我竟然咁都見佢唔到, 寧願隔著塊玻璃裝我哋嘅王子.  冇計啦, 鬼叫雨神嘅魅力畀你強勁得多咩!!!  唔知佢見到有咁多 fans 追著阿仔會有咩感想呢???  冇幾耐, 阿仔架車就駛走咗喇.  我哋就圍埋一齊傾仔經啦.  傾傾下, 又見到阿仔架車返轉頭喎!!!  (咁驚嚇??!!  明明走咗重乜又返轉頭呀??)  當時有好多 fans 已經閃咗人. 得返寥寥幾朵 "雲" 喺度傾計咋喎!!!  後尾見到肥仔茖車, 伸手喺啲工作人員度攞件黑色皮褸.  哇!!!  唔係呀化???!!  咁大熱天時著皮褸???  焗桑拿咩??   唔係畀我個仔著架化??  (後來證實, 的確係阿仔嘅戲服之一,  見到都戥佢熱呀.)

追完仔之後, 大家都見肚餓, 所以齊齊去完成之前講好嘅行程~~~飲茶, 睇天幕表演, 同埋行威尼斯人.  講真, 呢次係我第一次正式踏足馬交呢, 咩地方都未去過, 淨係跟著個衰仔轉, 上山落山, 頭暈眼花.  喺排隊等睇表演期間~~~又收到消息話阿仔喺某迴旋處拍飛車追逐戲.  哈哈, 唔係阿化??  又會次次都咁啱嘅??  次次睇天幕之前阿仔都急 call 我嘅??  衰仔, 畀你玩晒啦.  但係我唔係一個貪心嘅人, 我同班千姑都覺得呢幾日睇仔都睇得好滿足喇. 雖然今朝見阿仔只係驚鴻一瞥, 但都足夠我哋再三回味.  所以成班千姑都決定繼續行程, 唔去追仔喇.  後來去某酒店 high tea 時 , 撞到去追仔嘅 "雲" 返嚟, 佢哋獻寶咁畀咗啲視頻我哋睇, 見到阿仔著著今朝嗰件黑色皮褸喺度拍追逐飛車戲份, 緊張又刺激.  不過咁大熱天時著成咁,  我都有啲怕佢中暑呢!!!

到最後, 我哋食咗一個豐富嘅雞鮑翅晚餐之後, 就準備返屋企.  呢三日嘅行程, 我都好開心. 但係臨走嘅一刻就有啲唔捨得, 好唔想走, 好想繼續留喺馬交度追仔.  鳴~~~~~~~~我唔制呀!!!!  我要追仔!!!!  我唔要返工!!!  我唔想返屋企!!!

~~~完~~~
橫風狂三月暮, 門掩黃昏, 時時留비住 。

海蕩漾全年朝, 窗吐晨光, 日日待비來。

雨雲之家千秋萬載, 來。

奶奶吖..."我咁靚"係C父用開架wor...你係"我更靚"先岩wor
Rain★JiHoon 發表於 26-8-2010 13:51
你師父又唔係度,  所以 “我咁靚” 同 “我更靚” 都係我.
橫風狂三月暮, 門掩黃昏, 時時留비住 。

海蕩漾全年朝, 窗吐晨光, 日日待비來。

雨雲之家千秋萬載, 來。

你講的工作人員是指那位翻譯哥哥仔嗎? 佢真係好好人架!
又肯幫我把曲奇餅交比肥仔助手, 我睇住肥仔拎住然後上車同bibi 離開碼頭,
希望 bibi 喜歡吃啦! ...
yswong 發表於 27-8-2010 09:39
就係佢喇, 都唔知係佢唔好意思, 定係我哋唔好意思多啲.
橫風狂三月暮, 門掩黃昏, 時時留비住 。

海蕩漾全年朝, 窗吐晨光, 日日待비來。

雨雲之家千秋萬載, 來。

返回列表